₹25,000 ಬಜೆಟ್‌ನಲ್ಲಿ ಹೊಸ 5G ಸ್ಮಾರ್ಟ್‌ಫೋನ್ ಖರೀದಿಸಲು ಯೋಚಿಸುತ್ತಿದ್ದೀರಾ? ಹಾಗಾದರೆ Realme 15T ಮತ್ತು ಸ್ಯಾಮ್‌ಸಂಗ್ ಗ್ಯಾಲಕ್ಸಿ F70 5G ಈ ಎರಡು ಫೋನ್‌ಗಳನ್ನು ಒಮ್ಮೆ ಹೋಲಿಕೆ ಮಾಡಿ ನೋಡಿ. ರಿಯಲ್‌ಮಿ 15T ದೊಡ್ಡ ಬ್ಯಾಟರಿ, 120Hz AMOLED ಡಿಸ್ಪ್ಲೇ ಮತ್ತು ವೇಗದ ಚಾರ್ಜಿಂಗ್‌ನೊಂದಿಗೆ ಗಮನ ಸೆಳೆಯುತ್ತದೆ. ಮತ್ತೊಂದೆಡೆ, ಸ್ಯಾಮ್‌ಸಂಗ್ F70 5G OIS ಕ್ಯಾಮೆರಾ, Super AMOLED ಸ್ಕ್ರೀನ್ ಮತ್ತು ದೀರ್ಘಕಾಲದ ಸಾಫ್ಟ್‌ವೇರ್ ಬೆಂಬಲವನ್ನು ನೀಡುತ್ತದೆ.
ಹಾಗಾದರೆ ಕ್ಯಾಮೆರಾ, ಪರ್ಫಾರ್ಮೆನ್ಸ್, ಬ್ಯಾಟರಿ ಮತ್ತು ಡಿಸ್ಪ್ಲೇ ವಿಚಾರದಲ್ಲಿ ಯಾವ ಫೋನ್ ಉತ್ತಮವಾಗಿದೆ? ಎರಡರ ಪ್ರಮುಖ ಫೀಚರ್ಸ್‌ಗಳನ್ನು ಹೋಲಿಕೆ ಮಾಡಿ ನಿಮ್ಮ ಹಣಕ್ಕೆ ಯಾವುದು ಹೆಚ್ಚು ಮೌಲ್ಯ ನೀಡುತ್ತದೆ ಎಂಬುದನ್ನು ತಿಳಿಯೋಣ.
Realme 15T vs Samsung Galaxy F70 5G: ಫೀಚರ್ಸ್ ಹೋಲಿಕೆ
| ಫೀಚರ್ಸ್ | ರಿಯಲ್‌ಮಿ 15T | ಸ್ಯಾಮ್‌ಸಂಗ್ ಗ್ಯಾಲಕ್ಸಿ F70 5G |
|---|---|---|
| ಡಿಸ್ಪ್ಲೇ | 6.57 ಇಂಚು AMOLED | 6.7 ಇಂಚು Super AMOLED |
| ರಿಫ್ರೆಶ್ ರೇಟ್ | 120Hz | 90Hz |
| ಪ್ರೊಸೆಸರ್ | ಮೀಡಿಯಾಟೆಕ್ ಡೈಮೆನ್ಸಿಟಿ 6400 ಮ್ಯಾಕ್ಸ್ | ಎಕ್ಸಿನೋಸ್ 1330 |
| ಮುಖ್ಯ ಕ್ಯಾಮೆರಾ | 50MP | 50MP |
| ಸೆಲ್ಫಿ ಕ್ಯಾಮೆರಾ | 50MP | 13MP |
| ಬ್ಯಾಟರಿ | 7,000mAh | 5,000mAh |
| ಫಾಸ್ಟ್ ಚಾರ್ಜಿಂಗ್ | 60W | 25W |
| RAM | 8GB / 12GB | 4GB / 6GB |
| ಸ್ಟೋರೇಜ್ | 128GB / 256GB | 128GB |
| ಸಾಫ್ಟ್‌ವೇರ್ | Realme UI 6.0 | One UI 7 |
ಡಿಸ್ಪ್ಲೇ: 120Hz ಬೇಕಾ ಅಥವಾ Super AMOLED ಬೇಕಾ?
ರಿಯಲ್‌ಮಿ 15T ನಲ್ಲಿ 6.57 ಇಂಚಿನ Full HD+ AMOLED ಡಿಸ್ಪ್ಲೇ ನೀಡಲಾಗಿದೆ. ಇದು 120Hz ರಿಫ್ರೆಶ್ ರೇಟ್ ಹೊಂದಿದ್ದು, ಸ್ಕ್ರೋಲಿಂಗ್, ಗೇಮಿಂಗ್ ಮತ್ತು ವಿಡಿಯೋ ನೋಡುವಾಗ ಉತ್ತಮ ಅನುಭವ ನೀಡುತ್ತದೆ. ಜೊತೆಗೆ ಹೆಚ್ಚಿನ ಬ್ರೈಟ್‌ನೆಸ್ ಇರುವುದರಿಂದ ಹೊರಾಂಗಣದಲ್ಲೂ ಸ್ಕ್ರೀನ್ ಬಳಸಲು ಸುಲಭವಾಗುತ್ತದೆ.
ಇನ್ನು ಸ್ಯಾಮ್‌ಸಂಗ್ ಗ್ಯಾಲಕ್ಸಿ F70 5G ನಲ್ಲಿ 6.7 ಇಂಚಿನ Full HD+ Super AMOLED ಡಿಸ್ಪ್ಲೇ ಇದೆ. ಆದರೆ ಇದರ ರಿಫ್ರೆಶ್ ರೇಟ್ 90Hz ಮಾತ್ರ. ಜೊತೆಗೆ ಕಾರ್ನಿಂಗ್ ಗೊರಿಲ್ಲಾ ಗ್ಲಾಸ್ ವಿಕ್ಟಸ್ ರಕ್ಷಣೆ ನೀಡಲಾಗಿದೆ. ದೊಡ್ಡ ಸ್ಕ್ರೀನ್ ಬೇಕಾದರೆ ಇದು ಉತ್ತಮ ಆಯ್ಕೆ. ಆದರೆ ಸ್ಮೂತ್ ಸ್ಕ್ರೋಲಿಂಗ್‌ಗೆ ಆದ್ಯತೆ ನೀಡುವವರಿಗೆ 120Hz ಹೊಂದಿರುವ ಮೊದಲ ಫೋನ್ ಹೆಚ್ಚು ಸೂಕ್ತ.
ಪರ್ಫಾರ್ಮೆನ್ಸ್ ಮತ್ತು ಗೇಮಿಂಗ್
ರಿಯಲ್‌ಮಿ 15T ಸ್ಮಾರ್ಟ್‌ಫೋನ್ ಮೀಡಿಯಾಟೆಕ್ ಡೈಮೆನ್ಸಿಟಿ 6400 ಮ್ಯಾಕ್ಸ್ ಪ್ರೊಸೆಸರ್‌ನೊಂದಿಗೆ ಬರುತ್ತದೆ. ಇದರೊಂದಿಗೆ 8GB ಮತ್ತು 12GB RAM ಆಯ್ಕೆಗಳು ಲಭ್ಯವಿವೆ. ವಾಟ್ಸಾಪ್, ಯೂಟ್ಯೂಬ್, ಇನ್‌ಸ್ಟಾಗ್ರಾಂ ಮತ್ತು ದಿನನಿತ್ಯದ ಇತರ ಆ್ಯಪ್‌ಗಳನ್ನು ಬಳಸಲು ಉತ್ತಮವಾಗಿದೆ.
ಮತ್ತೊಂದೆಡೆ, ಸ್ಯಾಮ್‌ಸಂಗ್ ಗ್ಯಾಲಕ್ಸಿ F70 5G ನಲ್ಲಿ ಎಕ್ಸಿನೋಸ್ 1330 ಪ್ರೊಸೆಸರ್ ನೀಡಲಾಗಿದೆ. ಇದು 4GB ಮತ್ತು 6GB RAM ಆಯ್ಕೆಗಳೊಂದಿಗೆ ಬರುತ್ತದೆ. ಸಾಮಾನ್ಯ ಬಳಕೆಗೆ ಸಾಕಾಗುತ್ತದೆ. ಆದರೆ ಹಲವು ಆ್ಯಪ್‌ಗಳನ್ನು ಒಂದೇ ಸಮಯದಲ್ಲಿ ಬಳಸುವವರು 4GB ಮಾದರಿಗಿಂತ 6GB ಮಾದರಿಯನ್ನು ಆಯ್ಕೆ ಮಾಡಿಕೊಳ್ಳುವುದು ಉತ್ತಮ. ಈ ಎರಡೂ ಫೋನ್‌ಗಳು ಸಾಮಾನ್ಯ ಗೇಮಿಂಗ್‌ಗೆ ಸೂಕ್ತವಾಗಿದ್ದರೂ, ಹೈ-ಎಂಡ್ ಗೇಮಿಂಗ್‌ಗೆ ಅತ್ಯುತ್ತಮ ಆಯ್ಕೆಗಳಲ್ಲ.
ಕ್ಯಾಮೆರಾ: OIS ಹೊಂದಿರುವ ಸ್ಯಾಮ್‌ಸಂಗ್‌ಗೆ ಅನುಕೂಲ
ರಿಯಲ್‌ಮಿ 15T ಹಿಂಭಾಗದಲ್ಲಿ 50MP ಮುಖ್ಯ ಕ್ಯಾಮೆರಾ ಮತ್ತು 2MP ಸೆಕೆಂಡರಿ ಕ್ಯಾಮೆರಾ ಹೊಂದಿದೆ. ಸೆಲ್ಫಿಗಾಗಿ 50MP ಫ್ರಂಟ್ ಕ್ಯಾಮೆರಾ ಇದೆ. ಹಗಲು ಬೆಳಕಿನಲ್ಲಿ ಉತ್ತಮ ಫೋಟೋಗಳನ್ನು ತೆಗೆಯಬಹುದು. ಸೆಲ್ಫಿ ಮತ್ತು ವಿಡಿಯೋ ಕಾಲ್‌ಗಳಿಗೆ ಇದರ ಫ್ರಂಟ್ ಕ್ಯಾಮೆರಾ ಉಪಯುಕ್ತವಾಗುತ್ತದೆ. ಆದರೆ ಅಲ್ಟ್ರಾವೈಡ್ ಕ್ಯಾಮೆರಾ ಮತ್ತು OIS ಸೌಲಭ್ಯ ಇಲ್ಲ.
ಸ್ಯಾಮ್‌ಸಂಗ್ ಗ್ಯಾಲಕ್ಸಿ F70 5G ನಲ್ಲಿ 50MP OIS ಮುಖ್ಯ ಕ್ಯಾಮೆರಾ, 5MP ಅಲ್ಟ್ರಾವೈಡ್ ಮತ್ತು 2MP ಮ್ಯಾಕ್ರೋ ಕ್ಯಾಮೆರಾಗಳಿವೆ. ಸೆಲ್ಫಿಗಾಗಿ 13MP ಕ್ಯಾಮೆರಾ ನೀಡಲಾಗಿದೆ. OIS ಇರುವುದರಿಂದ ಫೋಟೋ ತೆಗೆಯುವಾಗ ಕೈ ಅಲುಗಾಡಿದರೂ ಚಿತ್ರ ಮಸುಕಾಗುವುದನ್ನು ಕಡಿಮೆ ಮಾಡಲು ಸಹಾಯವಾಗುತ್ತದೆ. ಅಲ್ಟ್ರಾವೈಡ್ ಕ್ಯಾಮೆರಾದಿಂದ ಹೆಚ್ಚಿನ ಪ್ರದೇಶವನ್ನು ಒಂದೇ ಫ್ರೇಮ್‌ನಲ್ಲಿ ಸೆರೆಹಿಡಿಯಬಹುದು. ಒಟ್ಟಾರೆ ಕ್ಯಾಮೆರಾ ಆಯ್ಕೆಗಳ ದೃಷ್ಟಿಯಿಂದ ಸ್ಯಾಮ್‌ಸಂಗ್‌ಗೆ ಅನುಕೂಲವಿದೆ.
ಬ್ಯಾಟರಿ ಮತ್ತು ಚಾರ್ಜಿಂಗ್
ರಿಯಲ್‌ಮಿ 15T ಯ ಪ್ರಮುಖ ಆಕರ್ಷಣೆ ಅದರ 7,000mAh ಬ್ಯಾಟರಿ. ಇದರೊಂದಿಗೆ 60W ಫಾಸ್ಟ್ ಚಾರ್ಜಿಂಗ್ ಮತ್ತು 10W ರಿವರ್ಸ್ ಚಾರ್ಜಿಂಗ್ ಸೌಲಭ್ಯವೂ ಇದೆ. ಹೆಚ್ಚು ಸಮಯ ಮೊಬೈಲ್ ಬಳಸುವವರು ಮತ್ತು ಪ್ರಯಾಣ ಮಾಡುವವರಿಗೆ ಈ ದೊಡ್ಡ ಬ್ಯಾಟರಿ ಉತ್ತಮ ಆಯ್ಕೆಯಾಗಿದೆ. ಆಗಾಗ್ಗೆ ಚಾರ್ಜ್ ಮಾಡುವ ಚಿಂತೆಯಿಲ್ಲದೆ ಹೆಚ್ಚು ಸಮಯ ಫೋನ್ ಬಳಸಬಹುದು.
ಇನ್ನೊಂದು ಫೋನ್‌ನಲ್ಲಿ 5,000mAh ಬ್ಯಾಟರಿ ಮತ್ತು 25W ಫಾಸ್ಟ್ ಚಾರ್ಜಿಂಗ್ ಸಪೋರ್ಟ್ ಇದೆ. ಸಾಮಾನ್ಯ ದಿನನಿತ್ಯದ ಬಳಕೆಗೆ ಇದು ಸಾಕಾಗುತ್ತದೆ. ಆದರೆ 7,000mAh ಬ್ಯಾಟರಿಗೆ ಹೋಲಿಸಿದರೆ ಸಾಮರ್ಥ್ಯ ಕಡಿಮೆ. ಜೊತೆಗೆ 25W ಚಾರ್ಜರ್ ಅನ್ನು ಪ್ರತ್ಯೇಕವಾಗಿ ಖರೀದಿಸಬೇಕಾಗುತ್ತದೆ.
ಸಾಫ್ಟ್‌ವೇರ್ ಮತ್ತು ಅಪ್‌ಡೇಟ್
ರಿಯಲ್‌ಮಿ 15T ಆಂಡ್ರಾಯ್ಡ್ 15 ಆಧಾರಿತ ರಿಯಲ್‌ಮಿ UI 6.0 ನೊಂದಿಗೆ ಬಿಡುಗಡೆಯಾಗಿದೆ. ಕಂಪನಿಯ ಭರವಸೆಯ ಪ್ರಕಾರ ಮೂರು ವರ್ಷಗಳ ಪ್ರಮುಖ ಆಂಡ್ರಾಯ್ಡ್ OS ಅಪ್‌ಡೇಟ್ ಮತ್ತು ನಾಲ್ಕು ವರ್ಷಗಳ ಸೆಕ್ಯೂರಿಟಿ ಅಪ್‌ಡೇಟ್ ಸಿಗಲಿದೆ.
ಇನ್ನು ಸ್ಯಾಮ್‌ಸಂಗ್ ಗ್ಯಾಲಕ್ಸಿ F70 5G ಆಂಡ್ರಾಯ್ಡ್ 15 ಆಧಾರಿತ One UI 7 ನೊಂದಿಗೆ ಬಿಡುಗಡೆಯಾಗಿದೆ. ಇದಕ್ಕೆ ನಾಲ್ಕು ತಲೆಮಾರುಗಳ ಆಂಡ್ರಾಯ್ಡ್ OS ಅಪ್‌ಗ್ರೇಡ್ ಮತ್ತು ಐದು ವರ್ಷಗಳ ಸೆಕ್ಯೂರಿಟಿ ಅಪ್‌ಡೇಟ್ ಸಿಗಲಿದೆ. ಹೀಗಾಗಿ ದೀರ್ಘಕಾಲ ಒಂದೇ ಫೋನ್ ಬಳಸುವವರಿಗೆ ಸ್ಯಾಮ್‌ಸಂಗ್ ಸ್ವಲ್ಪ ಹೆಚ್ಚಿನ ಸಾಫ್ಟ್‌ವೇರ್ ಬೆಂಬಲ ನೀಡುತ್ತದೆ.
Also Read: ₹30,000 ಒಳಗೆ ಮೊಬೈಲ್ ಖರೀದಿಸುವ ಪ್ಲ್ಯಾನ್ ಇದೆಯಾ? ಈ 6 ಫೋನ್‌ಗಳನ್ನು ನೋಡಿ
ಕೊನೆಯದಾಗಿ ಯಾವ ಫೋನ್ ಖರೀದಿಸಬೇಕು?
ರಿಯಲ್‌ಮಿ 15T ಮತ್ತು ಸ್ಯಾಮ್‌ಸಂಗ್ ಗ್ಯಾಲಕ್ಸಿ F70 5G ಎರಡೂ ವಿಭಿನ್ನ ರೀತಿಯ ಬಳಕೆದಾರರನ್ನು ಗಮನದಲ್ಲಿಟ್ಟುಕೊಂಡು ಬಂದಿರುವ ಫೋನ್‌ಗಳು. ದೊಡ್ಡ ಬ್ಯಾಟರಿ, 120Hz ಡಿಸ್ಪ್ಲೇ, 60W ಫಾಸ್ಟ್ ಚಾರ್ಜಿಂಗ್ ಮತ್ತು ಉತ್ತಮ ಸೆಲ್ಫಿ ಕ್ಯಾಮೆರಾ ಬೇಕಾದರೆ ರಿಯಲ್‌ಮಿ 15T ಆಯ್ಕೆ ಮಾಡಬಹುದು.
ಇನ್ನು OIS ಕ್ಯಾಮೆರಾ, ಅಲ್ಟ್ರಾವೈಡ್ ಲೆನ್ಸ್, Super AMOLED ಡಿಸ್ಪ್ಲೇ ಮತ್ತು ದೀರ್ಘಕಾಲದ ಸಾಫ್ಟ್‌ವೇರ್ ಅಪ್‌ಡೇಟ್‌ಗಳಿಗೆ ಆದ್ಯತೆ ನೀಡುವವರಿಗೆ ಸ್ಯಾಮ್‌ಸಂಗ್ ಗ್ಯಾಲಕ್ಸಿ F70 5G ಸೂಕ್ತವಾಗಿದೆ. ಖರೀದಿಸುವುದಾದರೆ ಸಾಧ್ಯವಾದಷ್ಟು 6GB RAM ಮಾದರಿಯನ್ನು ಆಯ್ಕೆ ಮಾಡಿಕೊಳ್ಳಿ. ಅಂತಿಮವಾಗಿ ನಿಮ್ಮ ಬಳಕೆ ಮತ್ತು ಪ್ರಸ್ತುತ ಮಾರುಕಟ್ಟೆ ಬೆಲೆಯನ್ನು ಗಮನಿಸಿ ನಿರ್ಧಾರ ತೆಗೆದುಕೊಳ್ಳಿ.
