ಒನ್‌ಪ್ಲಸ್ N6 ಲೈಟ್ (OnePlus N6 Lite) ಸೆಪ್ಟೆಂಬರ್ 22ರಂದು ಭಾರತದಲ್ಲಿ ಬಿಡುಗಡೆಯಾಗಿದ್ದು, ಇದೀಗ ಪ್ರಮುಖ ಪ್ಲಾಟ್‌ಫಾರ್ಮ್‌ಗಳಲ್ಲಿ ಖರೀದಿಗೆ ಲಭ್ಯವಿದೆ. ಒನ್‌ಪ್ಲಸ್ N6 ಮತ್ತು N6x ಬಳಿಕ ಈ ಸರಣಿಗೆ ಸೇರ್ಪಡೆಯಾದ ಮೂರನೇ ಫೋನ್ ಇದಾಗಿದೆ. ₹16,999 ಬೆಲೆಯಲ್ಲಿ 7,000mAh ಬ್ಯಾಟರಿ, 120Hz ಡಿಸ್‌ಪ್ಲೇ ಮತ್ತು Aqua Touch ಸೇರಿದಂತೆ ಹಲವು ಫೀಚರ್‌ಗಳನ್ನು ಇದು ನೀಡುತ್ತದೆ.
ಹಾಗಾದರೆ ಈ ಬೆಲೆಯಲ್ಲಿ ಬರುತ್ತಿರುವ ಈ ಫೋನ್‌ನಲ್ಲಿ ಏನೆಲ್ಲಾ ಸೌಲಭ್ಯಗಳಿವೆ? ಬೆಲೆ, ಫೀಚರ್‌ಗಳು ಮತ್ತು ಬಳಕೆಯ ಅನುಭವದ ದೃಷ್ಟಿಯಿಂದ OnePlus N6 Lite ಹೇಗಿದೆ ಎಂಬುದನ್ನು ನೋಡೋಣ.
Also Read: POCO M8x 5G vs OnePlus N6 5G: ಯಾವುದು ಬೆಸ್ಟ್? ಬೆಲೆ, ಫೀಚರ್ಸ್ ಹೋಲಿಕೆ
OnePlus N6 Lite ಬೆಲೆ
ಒನ್‌ಪ್ಲಸ್ N6 ಲೈಟ್ ಒಂದೇ ವೇರಿಯಂಟ್‌ನಲ್ಲಿ ಬರುತ್ತೆ: 4GB RAM ಮತ್ತು 64GB ಸ್ಟೋರೇಜ್. ಇದರ ಬೆಲೆ ₹16,999. OnePlus ಆ್ಯಪ್, Amazon, ಒನ್‌ಪ್ಲಸ್ ಎಕ್ಸ್‌ಪೀರಿಯನ್ಸ್ ಸ್ಟೋರ್‌ಗಳು ಮತ್ತು ಆಯ್ದ ರೀಟೇಲ್ ಅಂಗಡಿಗಳಲ್ಲಿ ಖರೀದಿಸಬಹುದು.
ಖರೀದಿ ವೇಳೆ Amazon ನಲ್ಲಿ ಆಯ್ದ ಕ್ರೆಡಿಟ್ ಕಾರ್ಡ್‌ಗಳಿಗೆ ₹750 ವರೆಗೆ ರಿಯಾಯಿತಿ ಸಿಗುತ್ತದೆ. Amazon Pay ICICI ಕ್ರೆಡಿಟ್ ಕಾರ್ಡ್ ಬಳಸಿ ಕ್ಯಾಶ್‌ಬ್ಯಾಕ್ ಪಡೆಯಬಹುದು. ಆಯ್ದ EMI ಕಾರ್ಡ್‌ಗಳಿಗೆ ಬಡ್ಡಿ ಉಳಿತಾಯದ ಆಫರ್ ಕೂಡ ಇದೆ. ಒನ್‌ಪ್ಲಸ್ ವೆಬ್‌ಸೈಟ್‌ನಲ್ಲಿ ಆಯ್ದ ಬ್ಯಾಂಕ್ ಕ್ರೆಡಿಟ್ ಕಾರ್ಡ್‌ಗಳ ಮೂಲಕ ಮೂರು ತಿಂಗಳವರೆಗೆ ನೋ-ಕಾಸ್ಟ್ EMI ಆಯ್ಕೆ ಮಾಡಬಹುದು. ಹಳೆಯ ಫೋನ್ ಕೊಟ್ಟು ಹೊಸದನ್ನು ಖರೀದಿಸುವ ಎಕ್ಸ್‌ಚೇಂಜ್ ಸೌಲಭ್ಯವೂ ಇದೆ. ಹಳೆಯ ಫೋನ್‌ನ ಮಾಡೆಲ್ ಮತ್ತು ಕಂಡಿಷನ್‌ಗೆ ತಕ್ಕಂತೆ ಮೊತ್ತ ಬದಲಾಗುತ್ತದೆ. ಈ ಆಫರ್‌ಗಳು ಬದಲಾಗಬಹುದು, ಆದ್ದರಿಂದ ಖರೀದಿಸುವ ಸಮಯದಲ್ಲಿ Amazon ಮತ್ತು ಒನ್‌ಪ್ಲಸ್ ವೆಬ್‌ಸೈಟ್‌ನಲ್ಲಿ ಒಮ್ಮೆ ನೋಡಿ.
ಬ್ಯಾಟರಿ – ಈ ಫೋನ್‌ನ ಹೈಲೈಟ್
ಒನ್‌ಪ್ಲಸ್ N6 ಲೈಟ್‌ನ ಮುಖ್ಯ ಆಕರ್ಷಣೆ 7,000mAh ಬ್ಯಾಟರಿ. ಸಾಮಾನ್ಯ ಬಳಕೆಯಲ್ಲಿ ಇದು ಸುಮಾರು ಮೂರು ದಿನಗಳವರೆಗೆ ಬಾಳಿಕೆ ಬರಲಿದೆ ಎಂದು ಕಂಪನಿ ಹೇಳಿದೆ. ಕಂಪನಿಯ ಅಂಕಿ-ಅಂಶಗಳ ಪ್ರಕಾರ, 26.8 ಗಂಟೆಗಳವರೆಗೆ ವಿಡಿಯೋ ಪ್ಲೇಬ್ಯಾಕ್ ಮತ್ತು ಸುಮಾರು 55.5 ಗಂಟೆಗಳ ವಾಯ್ಸ್ ಕಾಲಿಂಗ್ ಸಾಧ್ಯ. ಇವು ಕಂಪನಿಯ ಸ್ವಂತ ಟೆಸ್ಟ್ ಅಂಕಿ-ಅಂಶಗಳಾಗಿದ್ದು, ನಿಜವಾದ ಬಳಕೆಯಲ್ಲಿ ವ್ಯತ್ಯಾಸ ಇರಬಹುದು.
1,600 ಸೈಕಲ್‌ಗಳ (ಸುಮಾರು ಆರು ವರ್ಷದ ಬಳಕೆ) ನಂತರವೂ ಬ್ಯಾಟರಿ 80%ಕ್ಕಿಂತ ಹೆಚ್ಚಿನ ಸಾಮರ್ಥ್ಯ ಉಳಿಸಿಕೊಳ್ಳುತ್ತದೆ ಎಂದು ಒನ್‌ಪ್ಲಸ್ ಹೇಳಿದೆ. ಆದರೆ 15W ಪವರ್ ಮಾತ್ರ ಇರುವುದರಿಂದ, ಇಷ್ಟು ದೊಡ್ಡ ಬ್ಯಾಟರಿಯ ಚಾರ್ಜ್ ಪೂರ್ಣವಾಗಲು ಸಮಯ ಹಿಡಿಯುತ್ತದೆ. 5W ರಿವರ್ಸ್ ವೈರ್ಡ್ ಚಾರ್ಜಿಂಗ್ ಇರುವುದರಿಂದ ಬೇರೆ ಡಿವೈಸ್‌ಗಳಿಗೂ ಪವರ್ ನೀಡಬಹುದು.
ಡಿಸ್‌ಪ್ಲೇ ಮತ್ತು ಡಿಸೈನ್
ಫೋನ್ 6.75 ಇಂಚಿನ HD+ ಡಿಸ್‌ಪ್ಲೇ ಹೊಂದಿದ್ದು, 120Hz ರಿಫ್ರೆಶ್ ರೇಟ್ ಮತ್ತು 900 ನಿಟ್ಸ್‌ವರೆಗಿನ ಬ್ರೈಟ್‌ನೆಸ್ ಇದೆ. “Aqua Touch” ಫೀಚರ್‌ನಿಂದ ಕೈ ಒದ್ದೆಯಾಗಿದ್ದಾಗ ಅಥವಾ ಸ್ಕ್ರೀನ್ ಮೇಲೆ ನೀರಿನ ಹನಿಗಳಿದ್ದಾಗಲೂ ಟಚ್ ಸರಿಯಾಗಿ ಕೆಲಸ ಮಾಡುತ್ತೆ. ಮಳೆಗಾಲದಲ್ಲಿ ಇದು ಉಪಯೋಗಕ್ಕೆ ಬರುತ್ತೆ. ಡಿಸೈನ್ ವಿಷಯಕ್ಕೆ ಬಂದ್ರೆ, ಫೋನ್ 8.95mm ದಪ್ಪ ಇದ್ದು, ಸುಮಾರು 215 ಗ್ರಾಂ ತೂಕ ಹೊಂದಿದೆ. ರೌಂಡೆಡ್ ಎಡ್ಜ್‌ಗಳೊಂದಿಗೆ ಬರುತ್ತಿರುವ ಈ ಫೋನ್ ಮಿಡ್‌ನೈಟ್ ಹೈಪ್ ಮತ್ತು ನಿಯೋ ಗ್ರೀನ್ ಎಂಬ ಎರಡು ಬಣ್ಣಗಳಲ್ಲಿ ಬರುತ್ತದೆ.
ಪ್ರೊಸೆಸರ್ ಮತ್ತು ಸ್ಟೋರೇಜ್
ಆಕ್ಟಾ-ಕೋರ್ Unisoc T7250 ಪ್ರೊಸೆಸರ್, 4GB RAM ಮತ್ತು UFS 2.2 ಸ್ಟೋರೇಜ್ (64GB) ಇದೆ. ಮೈಕ್ರೋSD ಕಾರ್ಡ್ ಮೂಲಕ 2TB ವರೆಗೆ ಸ್ಟೋರೇಜ್ ಹೆಚ್ಚಿಸಬಹುದು. ಇದು 4G ಫೋನ್, 5G ಸಪೋರ್ಟ್ ಇಲ್ಲ. ಕಾಲಿಂಗ್, ಯೂಟ್ಯೂಬ್, ನ್ಯಾವಿಗೇಶನ್ ಮತ್ತು ಸಾಮಾನ್ಯ ಆ್ಯಪ್‌ಗಳಿಗೆ ಸಾಕಾಗಬಹುದು, ಆದರೆ ಹೆವಿ ಗೇಮಿಂಗ್ ಮತ್ತು ಮಲ್ಟಿಟಾಸ್ಕಿಂಗ್‌ಗೆ ಸೂಕ್ತವಲ್ಲ.
ಕ್ಯಾಮೆರಾ ಸೆಟಪ್
ಹಿಂಭಾಗದಲ್ಲಿ 13MP ಪ್ರೈಮರಿ ಕ್ಯಾಮೆರಾ ಇದ್ದು, ಹೈ-ರೆಸ್ ಮೋಡ್‌ನಲ್ಲಿ 50MP ಫೋಟೋಗಳನ್ನು ತೆಗೆಯಬಹುದು. 1080p 30fps ವರೆಗೆ ವಿಡಿಯೋ ರೆಕಾರ್ಡಿಂಗ್‌ ಬೆಂಬಲವಿದ್ದು, ಮುಂಭಾಗದಲ್ಲಿ 5MP ಸೆಲ್ಫಿ ಕ್ಯಾಮೆರಾ ಇದೆ. ಜೊತೆಗೆ AI ಕ್ಲಿಯರ್ ಫೇಸ್ ಮತ್ತು AI ಇರೇಸರ್ ಟೂಲ್ಸ್ ಕೂಡ ಸಿಗುತ್ತವೆ. ಆದರೆ ಛಾಯಾಗ್ರಹಣ ಈ ಫೋನ್‌ನ ಪ್ರಮುಖ ಪ್ಲಸ್ ಪಾಯಿಂಟ್ ಅಲ್ಲ, ಸಾಮಾನ್ಯ ಫೋಟೋಗಳು ಮತ್ತು ವಿಡಿಯೋ ಕಾಲ್‌ಗಳಿಗೆ ಇದು ಸಾಕಾಗುತ್ತದೆ.
ಡ್ಯುರಬಿಲಿಟಿ ಮತ್ತು ಸಾಫ್ಟ್‌ವೇರ್
ಈ ಫೋನ್‌ಗೆ MIL-STD-810H ಸರ್ಟಿಫಿಕೇಶನ್ ಸಿಕ್ಕಿದ್ದು, ಇದರಿಂದ ದೈನಂದಿನ ಬಳಕೆಯಲ್ಲಿ ಆಗುವ ಬಿದ್ದು ಹೋಗುವಿಕೆ ಮತ್ತು ಶಾಕ್‌ಗಳಿಂದ ರಕ್ಷಣೆ ಸಿಗಲಿದೆ. ಸಾಫ್ಟ್‌ವೇರ್‌ನಲ್ಲಿ ಆಂಡ್ರಾಯ್ಡ್ 16 ಆಧಾರಿತ OxygenOS 16 ಮತ್ತು 36 ತಿಂಗಳ “ಫ್ಲೂಯೆನ್ಸಿ ಪ್ರೊಟೆಕ್ಷನ್” ಇದೆ. ಗೂಗಲ್ ಜೆಮಿನಿ ಸಪೋರ್ಟ್ ಕೂಡ ಇದೆ.
Also Read: ₹25,000 ಒಳಗೆ Best Phone ಯಾವುದು? Top 7 5G Phones ಹೋಲಿಕೆ (2026)
ಕೊನೆಯ ಮಾತು
ಸಾಮಾನ್ಯ ಬಳಕೆ, ದೀರ್ಘ ಬ್ಯಾಟರಿ ಬ್ಯಾಕಪ್ ಮತ್ತು ಬಾಳಿಕೆಗೆ ಆದ್ಯತೆ ನೀಡುವವರಿಗೆ OnePlus N6 Lite ಪರಿಗಣಿಸಬಹುದಾದ ಆಯ್ಕೆಯಾಗಿದೆ. ಆದರೆ ಈ ಬೆಲೆಯಲ್ಲಿ 5G ಹಾಗೂ ಹೆಚ್ಚಿನ ಸ್ಪೆಸಿಫಿಕೇಶನ್‌ಗಳನ್ನು ನಿರೀಕ್ಷಿಸುವವರಿಗೆ ಇದು ಸೂಕ್ತವಾಗಿರದಿರಬಹುದು. ನಿಮ್ಮ ಬಳಕೆಗೆ ಯಾವುದು ಮುಖ್ಯ ಎಂಬುದನ್ನು ಗಮನಿಸಿ, ಇದೇ ಬಜೆಟ್‌ನ ಇತರ 5G ಫೋನ್‌ಗಳೊಂದಿಗೆ ಹೋಲಿಸಿ ಖರೀದಿ ನಿರ್ಧಾರ ತೆಗೆದುಕೊಳ್ಳುವುದು ಉತ್ತಮ.
