ಫೋಲ್ಡೇಬಲ್ ಫೋನ್ ಅಂದರೆ ಕೆಲವು ವರ್ಷಗಳ ಹಿಂದೆ ಕೇವಲ ಶೋಕಿಗಾಗಿ ಅಂತ ಅನಿಸುತ್ತಿತ್ತು. ಆದರೆ ಈಗ ಪರಿಸ್ಥಿತಿ ಬದಲಾಗಿದೆ. ಫೋನ್‌ನಲ್ಲೇ ಮೀಟಿಂಗ್, ಇಮೇಲ್, ವಿಡಿಯೋ, ಸಿನಿಮಾ ಎಲ್ಲ ನೋಡುವ ಜನಕ್ಕೆ ದೊಡ್ಡ ಸ್ಕ್ರೀನ್ ಬೇಕು ಅನಿಸುತ್ತಿದೆ, ಅದೇ ಸಮಯಕ್ಕೆ ಫೋನ್ ಪಾಕೆಟ್‌ಗೂ ಹೊಂದಬೇಕು. ಇದೇ ಕಾರಣಕ್ಕೆ ಫೋಲ್ಡೇಬಲ್‌ಗಳ ಕಡೆ ನೋಡುವವರ ಸಂಖ್ಯೆ ಹೆಚ್ಚುತ್ತಿದೆ.
ಈ ವಾರವಷ್ಟೇ Vivo ತನ್ನ X Fold 6 ಅನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಬೆಲೆ ₹2,19,999. ಅದೇ ಸಮಯದಲ್ಲಿ, ಎರಡು ವರ್ಷದ ಹಿಂದೆ ಬಂದ Samsung Galaxy Z Fold 6 ಈಗ ತುಂಬ ಕಡಿಮೆ ಬೆಲೆಗೆ ಸಿಗುತ್ತಿದೆ. ಹೊಸದನ್ನು ತಗೊಂಡರೆ ಇತ್ತೀಚಿನ ತಂತ್ರಜ್ಞಾನ ಸಿಗುತ್ತದೆ, ಆದರೆ ಜೇಬಿಗೆ ಭಾರ. ಹಳೆಯದನ್ನು ತಗೊಂಡರೆ ಒಂದು ಲಕ್ಷಕ್ಕೂ ಹೆಚ್ಚು ಉಳಿತಾಯ ಆಗಬಹುದು, ಆದರೆ ಕೆಲವು ವಿಷಯಗಳಲ್ಲಿ ಹಿಂದೆ ಉಳಿಯುತ್ತದೆ. ಇದೇ ಗೊಂದಲದಲ್ಲಿ ಹಲವರಿದ್ದಾರೆ.
ಹಾಗಾಗಿ ಈ ಲೇಖನದಲ್ಲಿ ಇವೆರಡನ್ನು ಬೆಲೆ, ವಿನ್ಯಾಸ, ತೂಕ, ಸ್ಕ್ರೀನ್, ಬ್ಯಾಟರಿ, ಕ್ಯಾಮೆರಾ ಮತ್ತು ಸಾಫ್ಟ್‌ವೇರ್ ಅನ್ನುವ ಕ್ರಮದಲ್ಲಿ ನೋಡೋಣ. ಯಾವ ಫೋನ್ ಎಲ್ಲಿ ಮುಂದಿದೆ, ಎಲ್ಲಿ ಹಿಂದಿದೆ ಅನ್ನೋದನ್ನು ಅಂಕಿಅಂಶಗಳ ಜೊತೆ ಸರಳವಾಗಿ ನೋಡೋಣ. ಇವು ಒಂದೇ ವರ್ಷದ ಫೋನ್‌ಗಳಲ್ಲ ಅನ್ನೋದು ನೆನಪಿಟ್ಟುಕೊಂಡೇ ಓದಿ.
Vivo X Fold 6 vs Samsung Galaxy Z Fold 6: Features ಹೋಲಿಕೆ
| ಫೀಚರ್ | Vivo X Fold 6 | Samsung Galaxy Z Fold 6 |
|---|---|---|
| ಬೆಲೆ | ₹2,19,999 | ಸುಮಾರು ₹1.35 ಲಕ್ಷ–₹1.50 ಲಕ್ಷ* |
| ಒಳಗಿನ ಸ್ಕ್ರೀನ್ | 8.02 ಇಂಚು AMOLED, 120Hz | 7.6 ಇಂಚು AMOLED, 120Hz |
| ಹೊರಗಿನ ಸ್ಕ್ರೀನ್ | 6.51 ಇಂಚು AMOLED, 120Hz | 6.3 ಇಂಚು AMOLED, 120Hz |
| ಗರಿಷ್ಠ ಬ್ರೈಟ್‌ನೆಸ್ | 5,000 ನಿಟ್ಸ್ | 2,600 ನಿಟ್ಸ್ |
| ಪ್ರೊಸೆಸರ್ | 3nm ಡೈಮೆನ್ಸಿಟಿ 9500 ಸೂಪರ್ ಎಡಿಷನ್ | ಸ್ನ್ಯಾಪ್‌ಡ್ರ್ಯಾಗನ್ 8 ಜೆನ್ 3 |
| RAM | 12GB | 12GB |
| ಸ್ಟೋರೇಜ್ | 512GB | 256GB / 512GB / 1TB |
| ಮುಖ್ಯ ಕ್ಯಾಮೆರಾ | 200MP, OIS | 50MP, OIS |
| ಟೆಲಿಫೋಟೋ ಕ್ಯಾಮೆರಾ | 50MP, 3x | 10MP, 3x |
| ಅಲ್ಟ್ರಾವೈಡ್ ಕ್ಯಾಮೆರಾ | 50MP | 12MP |
| ಬ್ಯಾಟರಿ | 6,900mAh | 4,400mAh |
| ವೈರ್ಡ್ ಚಾರ್ಜಿಂಗ್ | 80W | 25W |
| ವೈರ್‌ಲೆಸ್ ಚಾರ್ಜಿಂಗ್ | 40W | 15W |
| ತೂಕ | ಸುಮಾರು 228 ಗ್ರಾಂ | 239 ಗ್ರಾಂ |
| ದಪ್ಪ | 9.4mm (ಮಡಚಿದಾಗ) | 12.1mm (ಮಡಚಿದಾಗ) |
| ನೀರು/ಧೂಳು ರಕ್ಷಣೆ | IPX8, IPX9, IP5X | IP48 |
ಬೆಲೆ ವಿಷಯದಲ್ಲಿ Vivo vs Samsung
ಮೊದಲು ಬೆಲೆ ನೋಡೋಣ, ಯಾಕೆಂದರೆ ನಿರ್ಧಾರ ಹೆಚ್ಚಾಗಿ ಇಲ್ಲೇ ಆಗುತ್ತದೆ. ವಿವೋ X ಫೋಲ್ಡ್ 6 ಭಾರತದಲ್ಲಿ ₹2,19,999ಕ್ಕೆ ಬಂದಿದೆ. 12GB RAM ಮತ್ತು 512GB ಸ್ಟೋರೇಜ್ ಇರುವ ಒಂದೇ ಮಾಡೆಲ್ ಮಾತ್ರ ಸಿಗುತ್ತದೆ. ಅಕ್ಟೋಬರ್ 13ರಿಂದ Vivo ಇ-ಸ್ಟೋರ್, Amazon, Flipkart ಮತ್ತು ಅಂಗಡಿಗಳಲ್ಲಿ ಮಾರಾಟ ಶುರು. ಕಳೆದ ವರ್ಷದ X ಫೋಲ್ಡ್ 5 ₹1,49,999ಕ್ಕೆ ಬಂದಿತ್ತು, ಅಂದರೆ ಈ ಬಾರಿ ಸುಮಾರು ₹70,000 ಹೆಚ್ಚಳ. ಆಯ್ದ ಬ್ಯಾಂಕ್ ಕಾರ್ಡ್‌ಗಳಲ್ಲಿ ₹26,400 ತನಕ ಕ್ಯಾಶ್‌ಬ್ಯಾಕ್, ಎಕ್ಸ್‌ಚೇಂಜ್ ಬೋನಸ್ ಮತ್ತು ನೋ ಕಾಸ್ಟ್ ಇಎಂಐ ಕೂಡ ಇದೆ.
ಗ್ಯಾಲಕ್ಸಿ Z ಫೋಲ್ಡ್ 6 2024ರಲ್ಲಿ 256GB ಮಾಡೆಲ್‌ಗೆ ₹1,64,999 ಬೆಲೆಯಲ್ಲಿ ಬಂದಿತ್ತು. ಈಗ Amazon ನಲ್ಲಿ ಬಣ್ಣದ ಆಯ್ಕೆ ಅನುಸಾರ ₹1,34,999 ರಿಂದ ₹1,49,999 ತನಕ ಸಿಗುತ್ತಿದೆ. ಹೇಗೆ ಲೆಕ್ಕ ಹಾಕಿದರೂ ಎರಡರ ನಡುವೆ ₹70,000ರಿಂದ ₹85,000 ಅಂತರ ಇರುತ್ತದೆ.
ಡಿಸೈನ್ ಮತ್ತು ಡಿಸ್ಪ್ಲೇ
ಇಲ್ಲಿ ವಿವೋ ಸ್ವಲ್ಪ ಅಚ್ಚರಿ ಕೊಡುತ್ತದೆ. ಅಷ್ಟು ದೊಡ್ಡ ಬ್ಯಾಟರಿ ಇದ್ದರೂ ಫೋನ್ ಮಡಚಿದಾಗ ಕೇವಲ 9.4mm, ತೆರೆದಾಗ 4.4mm ದಪ್ಪ ಇದೆ, ತೂಕ ಸುಮಾರು 228 ಗ್ರಾಂ. ಸ್ಯಾಮ್ಸಂಗ್ ಫೋಲ್ಡ್ 6 ಮಡಚಿದಾಗ 12.1mm, ತೆರೆದಾಗ 5.6mm, ತೂಕ 239 ಗ್ರಾಂ. ಪಾಕೆಟ್‌ನಲ್ಲಿ ಇಟ್ಟು ಓಡಾಡುವಾಗ ಈ ವ್ಯತ್ಯಾಸ ನಿಜವಾಗಿಯೂ ಗೊತ್ತಾಗುತ್ತದೆ. ಒಂದು ಸಣ್ಣ ವಿವರ: ಜಾಗತಿಕ ಮಾಡೆಲ್‌ನಲ್ಲಿ ಬಣ್ಣಕ್ಕೆ ತಕ್ಕಂತೆ ತೂಕ ಸ್ವಲ್ಪ ಬದಲಾಗುತ್ತದೆ, ನೀಲಿ ಬಣ್ಣದ ಫೋನ್ ಸುಮಾರು 235 ಗ್ರಾಂ ಇದೆ.
ಸ್ಕ್ರೀನ್ ವಿಷಯದಲ್ಲಿ ವಿವೋ ಮುಂದಿದೆ. ಒಳಗೆ 8.02 ಇಂಚು, ಹೊರಗೆ 6.51 ಇಂಚು ಇದ್ದರೆ, Z ಫೋಲ್ಡ್ 6ಲ್ಲಿ ಇವು 7.6 ಮತ್ತು 6.3 ಇಂಚು. ಗರಿಷ್ಠ ಬ್ರೈಟ್‌ನೆಸ್ ವಿವೋ ದಲ್ಲಿ 5,000 ನಿಟ್ಸ್ ಅಂತ ಕಂಪನಿ ಹೇಳುತ್ತದೆ, ಗ್ಯಾಲಕ್ಸಿ Z ಫೋಲ್ಡ್ 6ರ ಒಳಗಿನ ಸ್ಕ್ರೀನ್ 2,600 ನಿಟ್ಸ್ ತನಕ ಹೋಗುತ್ತದೆ. ನೀರು, ಧೂಳಿನ ರಕ್ಷಣೆಯಲ್ಲೂ ವಿವೋ ಮುಂದಿದೆ. ಇದಕ್ಕೆ IPX8, IPX9, ಮತ್ತು IP5X ರೇಟಿಂಗ್ ಇದೆ. ಸ್ಯಾಮ್ಸಂಗ್‌ಗೆ IP48 ರೇಟಿಂಗ್ ಇದೆ. ಅಂದರೆ ನೀರಿನಿಂದ ರಕ್ಷಣೆ ಇದೆ, ಆದರೆ ಧೂಳಿನಿಂದ ರಕ್ಷಣೆ ವಿವೋಗಿಂತ ಕಡಿಮೆ.
ಬ್ಯಾಟರಿ ಮತ್ತು ಕ್ಯಾಮೆರಾ
ಸ್ಯಾಮ್ಸಂಗ್ ಗ್ಯಾಲಕ್ಸಿ Z ಫೋಲ್ಡ್ 6ರಲ್ಲಿ 4,400mAh ಬ್ಯಾಟರಿ ಇದ್ದರೆ, ವಿವೋ X ಫೋಲ್ಡ್ 6ನಲ್ಲಿ 6,900mAh ಬ್ಯಾಟರಿ ಇದೆ. ಚಾರ್ಜಿಂಗ್‌ನಲ್ಲೂ ದೊಡ್ಡ ಅಂತರವಿದೆ. ವಿವೋ 80W ವೈರ್ಡ್ ಮತ್ತು 40W ವೈರ್‌ಲೆಸ್ ಚಾರ್ಜಿಂಗ್ ಕೊಡುತ್ತದೆ, ಸ್ಯಾಮ್ಸಂಗ್ 25W ಮತ್ತು 15W ಮಾತ್ರ ನೀಡುತ್ತದೆ. ದಿನವಿಡೀ ದೊಡ್ಡ ಸ್ಕ್ರೀನ್‌ನಲ್ಲಿ ವಿಡಿಯೋ ನೋಡುವವರಿಗೆ, ಮೀಟಿಂಗ್ ಮಾಡುವವರಿಗೆ ಈ ಹೆಚ್ಚುವರಿ ಬ್ಯಾಟರಿ ಮತ್ತು ವೇಗದ ಚಾರ್ಜಿಂಗ್ ಉಪಯೋಗವಾಗುತ್ತದೆ.
ಕ್ಯಾಮೆರಾ ನೋಡಿದರೆ ಎರಡರ ನಡುವೆ ಸಾಕಷ್ಟು ವ್ಯತ್ಯಾಸ ಕಾಣಿಸುತ್ತದೆ. ವಿವೋದಲ್ಲಿ 200MP ಮುಖ್ಯ ಕ್ಯಾಮೆರಾ, 50MP ಟೆಲಿಫೋಟೋ (3x) ಮತ್ತು 50MP ಅಲ್ಟ್ರಾವೈಡ್, ಜೊತೆಗೆ ಝೈಸ್ ಟ್ಯೂನಿಂಗ್ ಇದೆ. ಗ್ಯಾಲಕ್ಸಿಯಲ್ಲಿ 50MP ಮೇನ್, 12MP ಅಲ್ಟ್ರಾವೈಡ್ ಮತ್ತು 10MP ಟೆಲಿಫೋಟೋ (3x) ಕ್ಯಾಮೆರಾಗಳಿವೆ. ಜೂಮ್ ಫೋಟೋ ಜಾಸ್ತಿ ತೆಗೆಯುವವರಿಗೆ ವಿವೋ ಎಕ್ಸ್ ಫೋಲ್ಡ್ 6 ಇಲ್ಲಿ ಹೆಚ್ಚು ಇಷ್ಟವಾಗಬಹುದು. ಆದರೆ ಫೋಟೋ ಚೆನ್ನಾಗಿ ಬರಲು ಮೆಗಾಪಿಕ್ಸೆಲ್ ಮಾತ್ರ ಕಾರಣವಲ್ಲ. ಬಣ್ಣ, ಕ್ಯಾಮೆರಾ ಪ್ರೊಸೆಸಿಂಗ್ ಕೂಡ ಅಷ್ಟೇ ಮುಖ್ಯ.
ಪ್ರೊಸೆಸರ್ ಮತ್ತು ಸಾಫ್ಟ್‌ವೇರ್
ವಿವೋ ಹೊಸ 3nm ಡೈಮೆನ್ಸಿಟಿ 9500 ಸೂಪರ್ ಎಡಿಷನ್ (Dimensity 9500 Super Edition) ಚಿಪ್ ಬಳಸಿದೆ. ಫೋಲ್ಡ್ 6ನಲ್ಲಿ ಸ್ನ್ಯಾಪ್‌ಡ್ರ್ಯಾಗನ್ 8 ಜೆನ್ 3 (Snapdragon 8 Gen 3) ಎರಡು ವರ್ಷ ಹಳೆಯದಾದರೂ ಗೇಮಿಂಗ್ ಮತ್ತು ಮಲ್ಟಿಟಾಸ್ಕಿಂಗ್‌ಗೆ ಸಾಕಷ್ಟು ವೇಗವಾಗಿದೆ. ದಿನನಿತ್ಯದ ಬಳಕೆಯಲ್ಲಿ ಹೆಚ್ಚಿನವರಿಗೆ ವ್ಯತ್ಯಾಸ ಗೊತ್ತಾಗುವುದಿಲ್ಲ.
ಸಾಫ್ಟ್‌ವೇರ್‌ನಲ್ಲಿ ಸ್ಯಾಮ್ಸಂಗ್‌ಗೆ ದೊಡ್ಡ ಪ್ಲಸ್ ಪಾಯಿಂಟ್ ಇದೆ. ಫೋಲ್ಡ್ 6ಗೆ 7 ವರ್ಷ OS ಮತ್ತು ಸೆಕ್ಯುರಿಟಿ ಅಪ್‌ಡೇಟ್ ಭರವಸೆ ಇದೆ. ಒಂದೇ ಫೋನ್ ಅನ್ನು ಹಲವು ವರ್ಷ ಬಳಸುವವರಿಗೆ ಇದು ಮುಖ್ಯ. ಜೊತೆಗೆ S Pen ಸಪೋರ್ಟ್ ಕೂಡ ಇದೆ, ಆದರೆ ಪೆನ್ ಪ್ರತ್ಯೇಕವಾಗಿ ಖರೀದಿಸಬೇಕು.
Also Read: iPhone Duo vs Galaxy Z Fold8: ಯಾವ ಫೋಲ್ಡಬಲ್ ಫೋನ್ ಬೆಸ್ಟ್?
Vivo X Fold 6 vs Galaxy Z Fold 6: ಯಾವುದು ಬೆಸ್ಟ್?
ದೊಡ್ಡ ಬ್ಯಾಟರಿ, ಒಳ್ಳೆಯ ಜೂಮ್ ಕ್ಯಾಮೆರಾ, ತೆಳ್ಳನೆಯ ಮತ್ತು ಹಗುರವಾದ ಫೋನ್ ಬೇಕು, ₹2.2 ಲಕ್ಷ ಖರ್ಚು ಮಾಡಲು ತೊಂದರೆ ಇಲ್ಲ ಅಂದರೆ ವಿವೋ ಎಕ್ಸ್ ಫೋಲ್ಡ್ 6 ಒಳ್ಳೆಯ ಆಯ್ಕೆ. ಹೊಸ ತಂತ್ರಜ್ಞಾನ, ದೊಡ್ಡ ಬ್ಯಾಟರಿ ಮತ್ತು ವೇಗದ ಚಾರ್ಜಿಂಗ್ ಇದರ ಪ್ರಮುಖ ಪ್ಲಸ್ ಪಾಯಿಂಟ್‌ಗಳು.
ಕಡಿಮೆ ಬೆಲೆಯಲ್ಲಿ ಫೋಲ್ಡೇಬಲ್ ಫೋನ್ ಬೇಕು, ಜೊತೆಗೆ ಹಲವು ವರ್ಷಗಳ OS ಮತ್ತು ಸೆಕ್ಯುರಿಟಿ ಅಪ್‌ಡೇಟ್‌ಗಳು ಬೇಕು ಅಂದರೆ ಸ್ಯಾಮ್ಸಂಗ್ ಗ್ಯಾಲಕ್ಸಿ Z ಫೋಲ್ಡ್ 6 ಪರಿಗಣಿಸಬಹುದು. ಬೆಲೆ ಇಳಿಕೆಯಾಗಿರುವುದರಿಂದ ಹಣದ ಮೌಲ್ಯದ ವಿಷಯದಲ್ಲೂ ಸ್ಯಾಮ್ಸಂಗ್ ಫೋಲ್ಡ್ 6 ಹೆಚ್ಚು ಆಕರ್ಷಕವಾಗಿದೆ.
