ಫೋನ್ ಕೊಳ್ಳುವಾಗ ಹೆಚ್ಚಿನವರು ಮೊದಲು ಕೇಳುವ ಪ್ರಶ್ನೆ, ಚಾರ್ಜ್ ಎಷ್ಟು ಹೊತ್ತು ಬರುತ್ತದೆ ಎಂಬುದು. ಈ ಅಗತ್ಯವನ್ನು ಗಮನದಲ್ಲಿಟ್ಟುಕೊಂಡು ಒಪ್ಪೊ ತನ್ನ K ಸಿರೀಸ್‌ಗೆ ಎರಡು ಹೊಸ ಫೋನ್‌ಗಳನ್ನು ತಂದಿದೆ. ಅವೇ K15s ಮತ್ತು K15x. K15s ನಲ್ಲಿ 8,000mAh ಹಾಗೂ K15x ನಲ್ಲಿ 6,500mAh ಬ್ಯಾಟರಿ ಇದೆ. ಇದರ ಜೊತೆಗೆ 120Hz ಸ್ಕ್ರೀನ್ ಮತ್ತು ಕೈಜಾರಿ ಬಿದ್ದರೂ ತಡೆಯುವ ಗಟ್ಟಿಯಾದ ಬಾಡಿ ಕೂಡ ಸಿಗುತ್ತದೆ. ಸದ್ಯ ಇವು ಚೀನಾದಲ್ಲಿ ಮಾತ್ರ ಅಧಿಕೃತವಾಗಿ ಬಿಡುಗಡೆಯಾಗಿವೆ. ಕ್ಯಾಮೆರಾ ಅಥವಾ ವೇಗದಲ್ಲಿ ಇವು ಅಷ್ಟೇನೂ ಗಮನ ಸೆಳೆಯುವುದಿಲ್ಲ, ಆದರೆ ಕಡಿಮೆ ಬೆಲೆಯಲ್ಲಿ ದಿನವಿಡೀ ಬರುವ ಫೋನ್ ಬೇಕು ಎನ್ನುವವರಿಗೆ ಇದು ಉತ್ತಮ ಆಯ್ಕೆಯಾಗಬಹುದು. ಇವುಗಳ ಬೆಲೆ, ವ್ಯತ್ಯಾಸ ಮತ್ತು ಭಾರತದಲ್ಲಿ ಬರುವ ಸಾಧ್ಯತೆಯ ಬಗ್ಗೆ ಮುಂದೆ ನೋಡೋಣ.
Also Read: Oppo Find X10 Series: ಹೊಸ ಫ್ಲ್ಯಾಗ್‌ಶಿಪ್ ಫೋನ್‌ಗಳ ಬೆಲೆ ಮತ್ತು ಫೀಚರ್ಸ್
OPPO K15s ಮತ್ತು K15x ಬೆಲೆ ಎಷ್ಟು?
K15s ನ 6GB RAM + 128GB ಮಾಡೆಲ್‌ಗೆ 1,699 ಯುವಾನ್ (ಸುಮಾರು ₹24,000) ಇದೆ. 8GB + 256GB ಮಾಡೆಲ್‌ಗೆ 1,999 ಯುವಾನ್ (ಸುಮಾರು ₹28,600) ಕೊಡಬೇಕು. ಇವೆರಡಕ್ಕೆ ಹೋಲಿಸಿದರೆ K15x ಕಡಿಮೆ ಬೆಲೆಯದು. ಇದರ 6GB + 128GB ಮಾಡೆಲ್ 1,399 ಯುವಾನ್ (ಸುಮಾರು ₹20,000), 6GB + 256GB ಮಾಡೆಲ್ 1,699 ಯುವಾನ್‌ಗೆ ಸಿಗುತ್ತದೆ. ಇದು ಶ್ಯಾಡೋ ಗ್ರೇ ಮತ್ತು ವಿಂಡ್ ಟ್ರೇಲ್ ಪರ್ಪಲ್ ಬಣ್ಣಗಳಲ್ಲಿ ಲಭ್ಯವಿದೆ.
ಸ್ಕ್ರೀನ್‌ನಲ್ಲಿ ಇವೆರಡರ ವ್ಯತ್ಯಾಸ ದೊಡ್ಡದು
ಬೆಲೆಯ ವ್ಯತ್ಯಾಸ ಹೆಚ್ಚಾಗಿ ಕಾಣುವುದು ಸ್ಕ್ರೀನ್‌ನಲ್ಲಿ. K15s ನಲ್ಲಿ 6.57 ಇಂಚಿನ AMOLED ಪ್ಯಾನೆಲ್ ಇದೆ. ಫುಲ್ HD+ ರೆಸಲ್ಯೂಶನ್, 120Hz ರಿಫ್ರೆಶ್ ರೇಟ್ ಮತ್ತು ಗರಿಷ್ಠ 1,400 ನಿಟ್ಸ್ ಬ್ರೈಟ್‌ನೆಸ್ ಇದೆ. ಈ ದರದಲ್ಲಿ AMOLED ಡಿಸ್ಪ್ಲೇ ಸಿಗುವುದು K15s ನ ಪ್ರಮುಖ ಪ್ಲಸ್ ಪಾಯಿಂಟ್. K15x ಸ್ಕ್ರೀನ್ ಇನ್ನೂ ದೊಡ್ಡದು, 6.75 ಇಂಚು. ಆದರೆ ಅದು HD+ LCD ಮತ್ತು ಬ್ರೈಟ್‌ನೆಸ್ 1,125 ನಿಟ್ಸ್. ಗಾತ್ರ ದೊಡ್ಡದಾದರೂ ಪಿಕ್ಸೆಲ್‌ಗಳು ಕಡಿಮೆ ಇರುವುದರಿಂದ ಹತ್ತಿರದಿಂದ ನೋಡಿದರೆ ಚಿತ್ರ ಅಷ್ಟು ಶಾರ್ಪ್ ಇರುವುದಿಲ್ಲ.
ಪ್ರೊಸೆಸರ್ ಮತ್ತು ಕ್ಯಾಮೆರಾ
K15s ನಲ್ಲಿ ಮೀಡಿಯಾಟೆಕ್ ಡೈಮೆನ್ಸಿಟಿ 6360 ಮ್ಯಾಕ್ಸ್ ಚಿಪ್ ಇದೆ, K15x ನಲ್ಲಿ ಡೈಮೆನ್ಸಿಟಿ 6300 ನೀಡಲಾಗಿದೆ. ಎರಡೂ ದೈನಂದಿನ ಬಳಕೆಗೆ ಸಾಕಾಗುವಷ್ಟು ಸಾಮರ್ಥ್ಯ ಹೊಂದಿವೆ. ಆದರೆ ಹೆವಿ ಗೇಮಿಂಗ್‌ಗಾಗಿ ಇವುಗಳನ್ನು ನಿರೀಕ್ಷಿಸಬೇಡಿ. K15s ನಲ್ಲಿ UFS 2.2 ಸ್ಟೋರೇಜ್ ಜೊತೆಗೆ ಹೀಟ್ ಕಡಿಮೆ ಮಾಡಲು VC ಕೂಲಿಂಗ್ ಕೂಡ ಕೊಟ್ಟಿದ್ದಾರೆ. ಸಾಫ್ಟ್‌ವೇರ್ ಆಗಿ ಆಂಡ್ರಾಯ್ಡ್ 16 ಆಧಾರಿತ ColorOS 16 ಸಿಗುತ್ತದೆ.
ಕ್ಯಾಮೆರಾ ವಿಷಯದಲ್ಲಿ K15s ನಲ್ಲಿ 50MP ಹಿಂದಿನ ಮತ್ತು 8MP ಮುಂದಿನ ಕ್ಯಾಮೆರಾ ಇದೆ. K15x ನಲ್ಲಿ 13MP ಮೇನ್ ಮತ್ತು 5MP ಸೆಲ್ಫಿ ಕ್ಯಾಮೆರಾ ಬಳಸಲಾಗಿದೆ. ಫೋಟೋಗ್ರಫಿ ನಿಮಗೆ ಮುಖ್ಯವಾಗಿದ್ದರೆ, ಈ ಸಿರೀಸ್‌ನಿಂದ ಹೆಚ್ಚು ನಿರೀಕ್ಷೆ ಇಟ್ಟುಕೊಳ್ಳದಿರುವುದು ಒಳ್ಳೆಯದು.
8,000mAh ಬ್ಯಾಟರಿ ಜೊತೆ ಉತ್ತಮ ರಕ್ಷಣೆ
ಈ ಸಿರೀಸ್‌ನ ಪ್ರಮುಖ ವಿಶೇಷತೆ ಬ್ಯಾಟರಿ. ಒಪ್ಪೋ K15s ನಲ್ಲಿ 8,000mAh ಬ್ಯಾಟರಿ ಇದ್ದರೆ, ಒಪ್ಪೋ K15x ನಲ್ಲಿ 6,500mAh ಬ್ಯಾಟರಿ ಇದೆ. ಎರಡೂ ಫೋನ್‌ಗಳಿಗೆ 45W ಫಾಸ್ಟ್ ಚಾರ್ಜಿಂಗ್ ಬೆಂಬಲವಿದೆ.
K15s ಬಾಡಿ ಕೂಡ ಸಾಕಷ್ಟು ಗಟ್ಟಿಯಾಗಿದೆ. ಇದಕ್ಕೆ IP69K, IP68 ಮತ್ತು IP66 ರೇಟಿಂಗ್‌ಗಳಿವೆ. ಜೊತೆಗೆ 15 ಮಿಲಿಟರಿ ಟೆಸ್ಟ್‌ಗಳನ್ನು ಪಾಸ್ ಮಾಡಿದೆ. ಧೂಳು ಮತ್ತು ನೀರಿನ ಜೊತೆಗೆ ಬಿಸಿ ನೀರಿನ ಜೆಟ್‌ಗಳನ್ನೂ ತಡೆದುಕೊಳ್ಳುವ ಸಾಮರ್ಥ್ಯ ಇದಕ್ಕಿದೆ. K15x ನಲ್ಲಿ IP64 ರೇಟಿಂಗ್ ಮಾತ್ರ ಇದೆ. ಮಳೆ ನೀರಿಗೆ ಅಷ್ಟೇನೂ ತೊಂದರೆ ಇಲ್ಲ, ಆದರೆ ನೀರಿನಲ್ಲಿ ಬಿದ್ದರೆ ಸಮಸ್ಯೆಯಾಗಬಹುದು.
Also Read: OPPO Reno 16 Series ಸಂಪೂರ್ಣ ಸ್ಪೆಸಿಫಿಕೇಶನ್ಸ್ ಮತ್ತು ಬೆಲೆ (2026)
ಕೊನೆಯ ಮಾತು
ಹೆಚ್ಚು ಖರ್ಚು ಮಾಡಲು ಸಾಧ್ಯವಿದ್ದರೆ K15s ಆಯ್ಕೆ ಮಾಡಬಹುದು. AMOLED ಸ್ಕ್ರೀನ್, ದೊಡ್ಡ ಬ್ಯಾಟರಿ ಮತ್ತು ಉತ್ತಮ ಬಾಡಿ ಪ್ರೊಟೆಕ್ಷನ್ ಸಿಗುತ್ತದೆ. ಬಜೆಟ್ ಬಿಗಿ ಇದ್ದು ಕರೆ, ವಾಟ್ಸಾಪ್, ವಿಡಿಯೋ ನೋಡುವುದಷ್ಟೇ ನಿಮ್ಮ ಬಳಕೆ ಆದರೆ K15x ಸಾಕು.
ಭಾರತದಲ್ಲಿ ಇವು ಯಾವಾಗ ಬರುತ್ತವೆ ಎಂದು ಒಪ್ಪೊ ಇನ್ನೂ ಹೇಳಿಲ್ಲ. ಹಾಗಾಗಿ ಇಲ್ಲಿನ ಬೆಲೆ ಮತ್ತು ಫೀಚರ್ಸ್ ಬದಲಾಗುವ ಸಾಧ್ಯತೆಯೂ ಇದೆ. ಭಾರತದಲ್ಲಿ ಅಧಿಕೃತವಾಗಿ ಬಿಡುಗಡೆಯಾದ ನಂತರವೇ ಇಲ್ಲಿನ ಬೆಲೆ ಬಗ್ಗೆ ಸ್ಪಷ್ಟ ಚಿತ್ರಣ ಸಿಗಲಿದೆ.
